لالة الليالي للشاعر توفيق ركضان القنيطري
🌹لالةْ الليالي🌹زجل
توفيق ركضان القنيطري
ليلة
ف قلوب لحباب
مقامها كبير و عالي
يا الغافل
ليلة ف العام
تغير حالك وحالي
فيها كتقدر لرزاق
لكل طامع مشتاق
المومن يغنيه الله
والظالم يرجع منها خالي
وا خويا زين هاد الليلة بالصلا والقرآن
وطلب العفو من الحنان المنان
إلا نصرك مولانا عزك عمرو ما يسالي
شمر كمامك
وحلي بذكر الله كلامك
و تسامح مع أصحابك وجيرانك
وتصدق عل المحتاج بالنفيس والغالي
ليلة بواب السما فيها مفتوحة
وذنوب العباد برحمة ربي مسموحة
هز يديك ودعي مع كل عزيز وغالي
يعتق رقابنا من صهد النار
ويشفع فينا النبي المختار
مول لعمامة لخضرا والجاه العالي
ليلة الخير فيها بلا حدود
هداها لينا مول الفضل والجود
الملايكة فيها على أعمالنا شهود
تدون فعالك وافعالي
ليلْها أمن وسلام
وصلاة على نبينا بدر التمام
هي ليلة القدر
لالة الليالي
🌹توفيق ركضان القنيطري 🌹
لالة=سيدة
Commentaires
Enregistrer un commentaire