أمل و ألم للشاعر عبد الله رجب أبو عدنان

 أمل وألم..

عبدالله رجب ابوعدنان

أمل بيرسم خيوط

فرحة وردة طارحة

ونفس راضية ومسامحة

أو زغروطه حلوة مصبحة

أو بيصنع حياة

من بعد موت

ألم بيرسم وجع

ع الحزن اللي مالو مرتجع

وع العين م الهم والشقا بتدمع

وع الظلم ف بلدنا مسمع

والعدل واقف من بعيد

ونظرة عنين بتلمع

وماليها السكوت

أمل وألم نفس الحروف

احنا ف زمن اللعب ع المكشوف

حتى لما بفرح

ببقى خايف وقلبي مخطوف

لأن بعد فرحتنا

تلاقي الحزن فينا مشروط

أمل مكسوف وبيداري كسوفة

وألم مذعور م اللي بيشوفة

وقلبي مكسور من شدة خوفة

والغلا غول ما حد قادر يقف ف طريقه

والبكا انين من غير صوت

ممكن يكون كلام مجانين

ولا وجع ناس شقيانين

ولا أمل مع ألم شاعر حزين

بحلم ببكرة

يكون خالي م العبودية والجبروت

وصوت الشعر مش عبادة ولا كهنوت

الشاعر زية زيك

يعاني ويتالم ويبكي ويحب

والأمل عقد مفروط

أمل وألم..

بقلمي عبدالله رجب ابوعدنان